En SumaRibeira pensamos que A DORNA debe respectarse e potenciarse á hora de outorgarlle preferencia como Festivo Local. Por sorte para Ribeira, e grazas ao grande traballo desenvolvido ao longo de moitos anos polo pobo, e especialmente por distintas xeracións da xuventude ribeirense, A DORNA é a FESTA por excelencia de Ribeira, sendo referente moito máis aló do noso concello, e mesmo bisbarra, como festa de verán. Parécenos incuestionable que é hoxe un VALOR importante en distintos aspectos (festivo, económico, cultural, turístico,…) que, máis alá de outras repectables consideracións, debemos coidar con agarimo e potenciar entre todas.

En condicións habituais defenderíamos como segundo festivo o Martes de Entroido, pero pensamos que no contexto da pandemia, lamentablemente, é moi probable que as medidas de prevención da saúde comunitaria teñan que limitar en grande medida as posibilidades da importante celebración popular que habitualmente acompaña ao noso Entroido. É por iso que pensamos que este ano é conveniente substituír o Martes de Entroido pola festividade de San Xoán (xoves 24 de xuño), festa popular na que se da unha coincidencia de festexos entre a do día propio do santoral e a ancestral celebración ao redor do solsticio de verán.

De acordo co exposto en SumaRibeira decidimos presentar unha emenda á proposta do alcalde (16 de febreiro Martes de Entroido e venres 16 de xullo festividade da Virxe do Carme), e substituíla pola consistente en determinar como día festivos locais San Xoán (xoves 24 de Xuño) e a Festa da Dorna (sábado 24 de xullo).

Ante as declaracións aos medios feitas este mércores polo Alcalde queremos manifestar o seguinte:

Presentándoo como un argumento central, que amosaría, segundo a súa libre interpretación, unha incoherencia que as concelleiras da oposición non permitisen a licitación do Auditorio por un valor total duns 4.700.000€, o Alcalde afirmou que este incremento orzamentario levaría a ter que dispoñer “so” de 1.200.000€ (300.000€ menos dos 1.500.000€) que no Pleno de 26-11-2019 se aprobaran en concepto de ampliación de crédito para esta infraestrutura.

En SumaRibeira estamos en condicións de afirmar que, quizais inconscientemente traizoado pola incerteza do resultado da votación que terá lugar no Pleno deste luns 28, con estas declaracións está esquivando a realidade dos feitos, que é claramente incompatible coa veracidade das declaracións feitas polo Alcalde.

O que realmente dixo o Alcalde, tanto en Xunta de Voceiras como no Pleno do 26-11-19 foi que se solicitaba a aprobación do crédito por 1.500.000€ por necesidade legal de dispoñer de liquidez inmediata suficiente para poder licitar con prontitude a obra, e así cumprir os prazos de execución condicionados polos fondos “FEDER”. Pero se dixo con toda claridade, que co comprometido ata ese día en subvencións xestionadas pola Alcaldía, como máximo o concello precisaría só 500.000€ dese millón e medio. É dicir, incompatiblemente co afirmado por el, de aprobarse o presuposto de 4.200.000€ (equipamento excluído) o concello precisaría dispoñer de 700.000€ máis dos 500.000€ prometidos, e non os “300.000 menos de 1.500.000” que equivocadamente argumenta agora (e dicir, o Alcalde incorre nun “desfase” de un millón de euros, pois di que son 300.000 menos de 1.500.000 cando son realmente 700.000 máis do tope de 500.000 ao que se comprometera). A todo isto deberase sumar o custe do equipamento do Auditorio, que ao parecer estaría ao redor de 400 ou 500 mil euros.

Visto o exposto, cremos que non existe a máis mínima incoherencia entre que o Pleno do 26-09-19 aprobara o citado crédito de 1.500.000€ (cos votos a favor do PP e BNG, abstención do PSOE e votos en contra do PBBI e SumaRibeira), e que agora calquera concelleira da oposición decida votar en contra. Dicir o contrario nos parece un exercicio de “ilusionismo dialéctico” dende a contrariedade por un Equipo de Goberno Municipal que fixo, ao noso entender, unha mala e incoherente xestión en todo este proceso que eles dirixiron.

Acompañamos transcrición de declaracións feitas polo alcalde o 23-09-20, e da acta coa intervención do alcalde no Pleno de 26-11-19 no que se aprobou o Suplemento de Crédito de 1.500.000€

Declaracións do Alcalde na Rolda de Prensa do mércores 23-09-20:

“o novo Auditorio custaralles ás arcas municipais menos cartos dos que os grupos da Corporación autorizaron segundo o aprobado no pleno de novembro de 2019”.
“aprobouse un suplemento de crédito por un importe de 1,5 millóns de euros en concepto de achega municipal para construír un inmóbel de 3,6 millóns de euros, que tamén estaba co-financiado por fondos europeos da EDUSI”.
“cos seus custes reais serían inferiores en 300.000 euros a ese 1,5 millóns de euros autorizado no mes de novembro”.

Transcrición de intervención do Alcalde segundo figura na Acta do Pleno de 26-11-19:
“Para tal fin, esta Alcaldía xa ten solicitado e está en trámite a concesión de axudas adicionais fronte a outras Administracións. Estas axudas serían as seguintes:

• Subvención da Deputación da Coruña, por importe de 300.000 euros.
  – Subvención da Consellería de Cultura da Xunta de Galicia, por importe de 400.000euros.
• Subvención da Consellería de Medio Ambiente da Xunta de Galicia, por importe de 500.000 euros, dos que 129.470 euros xa están asinados mediante o “Convenio de Colaboración entre a Consellería de Medio Ambiente, Territorio e Vivenda, e o Concello de Riveira para o financiamento da redacción do proxecto do novo Auditorio Municipal, coa data 12.11.2019.
  A intención desta Alcaldía, tendo en conta os prazos de licitación e de execución da obra e os prazos de xustificación dos fondos europeos, é proceder a licitación da obra na maior brevidade posible, para o cal é necesario contar coa financiación suficiente polo importe total do proxecto. Xa que as subvencións citadas anteriormente están pendentes da sinatura dos respectivos convenios, proponse a concertación dunha liña de crédito polo importe necesario para cubrir a totalidade do importe do proxecto da obra. Esta liña unicamente se chegará a formalizar polo importe que sexa necesario, de tal maneira que as subvencións que se vaian confirmando irán diminuíndo o importe do préstamo, así como a posible baixa derivada da licitación da obra. O procedemento necesario para levar a cabo esta liña de crédito é a través dunha modificación orzamentaria, neste caso un suplemento de crédito, xa que se trata de gastos cuxa execución non é posible demorar ao exercicio seguinte. A fonte de financiación sería neste caso unha operación de crédito.

Transcrición do audio (que forma tamén parte da Acta) do momento en que o Alcalde di ao Pleno que, co conseguido en subvencións ata ese día, só se precisaría utilizar un máximo de 500.000€ do crédito de 1.500.000.

“o montante máximo que este Concello estaría a financiar nesa obra sería, aparte dos fondos europeos, 500.000€ e por eso que para evitar problemas de futuro, pois propoñemos xa esta operación para que esa obra se poida licitar este mismo ano. E dicir, no momento que chegue o proxecto inténtala licitar, para que esta obra poidera ser unha realidade nas Navidades do ano 21, e podamos celebrar aquí tamén o Xacobeo.”

Resumidamente, a traxectoria de crecente e continuado incremento do presuposto necesario para a construción do Novo Auditorio Municipal de Ribeira é a seguinte:
1.- O crédito inicial dispoñible era de 2.100.000€, con orixe nas seguintes achegas:
Fondos FEDER para a construción do Auditorio: 1.480.000
Fondos do Concello para a construción do Auditorio: 370.000
Fondos FEDER “Smart Instalaciones Auditorio”: 200.000
Fondos do Concello para instalacións do Auditorio: 50.000.
2.- O oito de Outubro de 2019 a empresa gañadora do concurso presenta un breve escrito no que alega carencias que tería o Auditorio de axustarse ao presuposto de 2.500.000, ao que se axustaron máis de trinta empresas que se presentaron á primeira fase co concurso. Ao entender de SumaRibeira, lidas detidamente as Bases do Concurso e a Memoria presentada á fase final do proxecto gañador “Choiva Pedra e Cristal” moitas das carencias esgrimidas pola empresa si estaban claramente recollidas nas Bases do Concurso e/ou na Memoria. Entre as “carencias” citadas para argumentar a necesidade dun importante incremento orzamentario estaban, por exemplo, que a infraestrutura non sería apta para moitas representacións teatrais e a ausencia de climatización en determinadas dependencias.

En base a este breve escrito, que nos foi presentado aos grupos políticos en Xunta de Voceiros transcorrido un mes dende a súa recepción no concello, a empresa gañadora solicita a aceptación dun Presuposto de Execución por Contrata de 4.002.922€, é dicir, un incremento dun 60%.
Sen previo debate algún sobre a procedencia de aceptar as demandas da empresa, o Equipo de Goberno decide levar ao Pleno Municipal a aprobación dun crédito extraordinario de 1.499.000 para acadar un orzamento de 3.599.000, que, ao parecer, sería suficiente para a realización dun Auditorio con toda a dotación “suficiente e necesaria” para Ribeira.
Para maior contrariedade e sorpresa, sae a licitación a obra polos 3.599.000€ e só se presenta unha empresa, que, segundo o que se nos di, solicita certos cambios puntuais nas calidades dos materiais alegando escaseza no orzamento.

En continuidade coa liña de informalidade e despropósitos, ao parecer, a empresa de arquitectura gañadora do concurso lamenta ter cometido un erro (ao noso entender outro “erro” máis) no cálculo do segundo presuposto, e comunica ao concello que o novo presuposto ten que subir de 3.599.000€ a 4.739.000€ . Esta será, moi posiblemente, a cantidade que terá que ser sometida a votación do Pleno Municipal para saír a nova licitación pública.

Lamentamos moito vernos na necesidade de dicir que nos parece unha obscenidade política que se queira relativizar a importancia de incrementar un orzamento de fondos públicos dende 2.500.000 a 4.739.000 (un aumento aproximado do 90%). Se a isto lle engadimos o delicadísimo contexto económico municipal, autonómico, español, europeo e mundial provocado pola Pandemia, para SumaRibeira este incremento non é admisible.

Ante esta traxectoria descrita, cremos que debemos transmitir unha síntese da nosa avaliación. O Equipo de Goberno Municipal ven amosando no tema do Auditorio unha xestión incompetente, e o afirmamos porque:

• É mala xestión que saia un primeiro concurso de ideas mal presupostado.
• É mala xestión que non se defendan aspectos importantes, que alegou a empresa gañadora como carencias nas bases do concurso para demandar un importante incremento orzamentario, cando en realidade si estaban recollidos nas bases ou no anteproxecto finalista.
• É mala e incompetente xestión política do Equipo de Goberno que, vistos os antecedentes, non se contrastase o segundo presuposto de 3.599.000€ cunha auditoría externa antes de sacar a concurso por esa cifra aportada exclusivamente por unha empresa, que xa asomara posible “incompetencia” na elaboración dun presuposto. Agardamos que só sexa incompetente nese aspecto de taxadora.
• É razoable e aceptable que unha empresa se presente á licitación e que despois asome dúbidas sobre a posibilidade de rematar a obra cumprindo ao cen por cento coa totalidade do proxecto?.

En SumaRibeira nos parece inaceptable que ao longo deste errático e torpe percorrido seguido ata hoxe se nos presente sempre como principal argumento a necesidade de tirar para diante e aceptar con rapidez, porque se non está rematado o Auditorio para finais do 2.022 Ribeira perdería 1.680.000€ dos fondos do FEDER, que supoñen un 35% dos ¿finais? 4.739.000, que se nos amosan actualmente como imprescindibles para dotar ao noso concello “cun Auditorio como se merece”.

Nós non estamos dispostos a asumir a “chantaxe política” consistente en ter que asumir que ou se aproba este presuposto “final” ou perderíamos os Fondos FEDER, e, xa que logo, se votamos en contra seríamos “culpables politicamente” de que Ribeira non tivese un Novo Auditorio. Pois SumaRibeira di que non, que non vai entrar na “nasa” (sen posible saída) que obriga a aceptar que o único percorrido posible sexa aceptar pasar de 2.500.000€ a 4.739.000 (quedará aí definitivamente?) ou expoñerse a aparecer publicamente como unha organización contraria a que Ribeira teña un novo auditorio. Imos asumir os riscos, dicimos claramente que non nos facemos nin nos imos facer partícipes, a ningún prezo, deste mal exemplo de xestión dos fondos públicos. O fin, tamén neste caso, non xustifica os medios. Agardamos que cunha praxe política asumible haxa pronto oportunidade para facer realidade un Auditorio Municipal coherente con Ribeira e coherente en todo o seu proceso de consecución. Que sexa a protagonista desta infraestrutura esta ou outra vindeira Corporación Municipal. Ninguén é imprescindible.

En SumaRibeira, facéndonos eco da xustificada preocupación existente ante o comezo do curso escolar, e centrándonos no referente á necesidade dun cumprimento eficaz e xeneralizado das medidas preventivas aconselladas polos organismos competentes por mor da evolución da Pandemia, pensamos que é necesario facilitar medios materiais que contribúan a paliar o importante esforzo que para as familias con menos recursos económicos pode supoñer, por exemplo, a necesaria utilización a diario de máscaras de protección fiables. Pensamos que, como xa se está facendo en países do noso entorno, as máscaras deberían estar subvencionadas polas administracións competentes, cando menos para as familias con menos recursos económicos. Hai evidencia de que a eficacia das medidas preventivas reguladas pola administración depende necesariamente do adecuado cumprimento das mesmas por toda a poboación, sendo así que na comunidade escolar, por exemplo, para que as máscaras cumpran coa súa función será necesario que todas as persoas que comparten a mesma aula utilicen decote unha máscara que cumpra cos estándares establecidos. É responsabilidade das administracións competentes que non sexan as dificultades económicas obxectivas as que dificulten ou impidan cumprir a unha integrante da comunidade escolar coa obriga de colaborar solidariamente no coidado da saúde de todas. Por estes e outros motivos entendemos xustificada a necesidade de que o Alcalde proceda con dilixencia á convocatoria do Consello Escolar Municipal, no que o Concello pode e debe manter unha comunicación fluída e directa coa comunidade escolar do noso concello, que sen dúbida pode ser de axuda para un mellor coñecemento das necesidades dos centros de ensino na prevención do COVID, e na dinamización da comunicación e obtención de axudas suficientes das administracións competentes.

É polo exposto que SOLICITAMOS

1.- A convocatoria urxente do Consello Escolar Municipal

2.- Instar ás administracións competentes a que artellen un mecanismo de subvención para a adquisición de máscaras, destinado ás estudantes de familias con menos recursos económicos, para así equilibrar no posible os necesarios esforzos individuais na procura solidaria da Saúde Comunitaria.

Xurxo Ferrón Vidán, concelleiro-voceiro do Grupo Político Mixto-Suma Ribeira, en
relación co incremento de presuposto para o Novo Auditorio de Ribeira, e logo de
considerar conveniente deixar transcorrer varias semanas dende a declaración do
“Estado de Alarma”, se dirixe ao Alcalde para presentar a Corporación Municipal o
escrito seguinte:

O Concelleiro de SumaRibeira, logo de varios intentos, conseguiu acceder á Memoria
do Proxecto de “Choiva Pedra e Cristal”, presentada cos outros dous proxectos
seleccionados na “fase 1”, e que foi o proxecto proclamado gañador o 14-05-2019 na
fase final (“fase 2” ). Nesta Memoria, que só conseguimos fotocopiada, queremos
salientar algúns aspectos concretos que fan cuestionar e rexeitar a SumaRibeira a
xustificación das demandas dun importante incremento presupostario solicitado por
“PGP Arquitectes” ao noso Concello en escrito de 8-10-2019:

Na memoria, axustada ao presuposto máximo de 2.500.000€ (exactamente
2.499.999,95) concreta que “el Auditorio cuenta con 526 butacas…”, pero no escrito
referido de 8-10-2019 di que por ter 62 prazas máis que o límite fixado debe
incrementarse o presuposto en 32.400€.
No escrito da empresa PGP tamén se quere xustificar un incremento de presuposto de
422.000€ (caixa escénica e peine 150.000 + equipamento escénico 272.000) en base a
que, segundo din, despois da adxudicación cómpre definir se se quere un Auditorio, un
Teatro, ou unha Sala Polivalente (usos múltiples de Auditorio e Teatro). Pero ao
entender de SumaRibeira, con anterioridade á resolución da fase final do concurso xa
estaba clara e reiteradamente definida a condición de Sala Polivalente do
“Auditorio”. Neste punto, dada a importancia que pode ter esta cuestión, quérense
facer as seguintes puntualizacións:

• Como xa se transmitiu ao Concello (escrito de 6-01-2020) por SumaRibeira,
  consultando por iniciativa propia (ás concelleiras non nos foi facilitado antes de tomar
  a decisión no Pleno Municipal sobre a concesión na súa totalidade das demamdas de
  “PGP”) o “Concurso de Ideas para o Novo Auditorio Municipal de Ribeira e o seu
  Entorno”, sorprendentemente, vese que nestas Bases aparecen, entre outras,
  reflectidas as seguintes concrecións:
• O Proxecto terá “Adaptabilidade escénica e poli funcional para a
  realización de espectáculos de distinta índole” (páxina 9).
• Disporá de “Caja escénica, compuesta y equipada con los elementos
  imprescindibles (candilejas, tramoya, etc,…)” (páx. 12).
• Tamén recolle o Concurso de Ideas que “Por otra parte el desarrollo
  del proyecto definitivo de obra, deberá de dotar al edificio de todas las
  instalaciones necesarias, así como el equipamiento preciso, para que
  una vez sea recibida la obra por la Administración, sea útil y apropiado
  para iniciar la actividad para la que fue proyectado, sin tener que
  realizar inversiones de equipamiento e instalaciones para el perfecto
  funcionamiento del mismo”.
• Pero, por se fose aínda necesaria maior definición da condición de Sala
  Polivalente, logo de varios intentos, o concelleiro de SumaRibeira tivo por fin acceso á
  Memoria do Proxecto gañador “Choiva Pedra e Cristal”, no que a empresa,
  explicando á readaptación do Proxecto aos requirimentos do Xurado ás tres
  empresas finalistas na Fase 1, di: “El programa diseñado por el equipo técnico se ha
  adaptado para mejorar la funcionalidad del Auditorio y dotar el equipamiento de la
  posibilidad de acoger propuestas de programación diversas creando espacios flexibles
  y multifuncionales. Las dimensiones de este equipamiento sitúan este proyecto
  dentro de los Auditorios de gran formato de Galicia.”. Asemade na memoria, tamén
  describe, dentro do apartado da “Caja Escénica – Escenario”, que “con la finalidad de
  que el escenario permita acoger cómodamente espectáculos de medio y gran formato
  se ha diseñado con unas dimensiones generosas,…” e no “Suelo del escenario
  /sótano” di: “ El suelo de la escena cuenta con un sótano de altura libre de 2,70m para
  permitir el montaje y desmontaje de mecanismos elevadores para hacer apariciones
  de actores y decorados. El sótano tiene conexión con el montacargas para facilitar el
  movimiento de decorados pesados.”. Neste contexto, que ao entender de
  SumaRibeira resulta incompatible coa alegación de “PGP” de que no Proxecto gañador
  está definido só un Auditorio, “de uso enfocado a la realización de conferencias,
  concieros, recitales, etc.” É tamén moi esclarecedor o punto “2.29 Memoria de
  Unidades por Obra – Equipamiento Escénico” onde di: “El sistema de maquinaria de
  elevación permitirá la sustentación y desplazamiento vertical de los telones, decorados
  y equipos de iluminación instalados sobre el escenario y la sala. Así mismo, y debido a
  la estructura superior de telar seleccionada será posible la eventual instalación de
  equipos de elevación sobre cualquier punto del escenario. El cuerpo principal del
  sistema de maquinaria estará formado por una dotación principal de 18 conjuntos
  motorizados de barra de velocidad fija sobre la zona escénica, complementado con una
  dotación de 20 motores puntuales móviles de velocidad fija, todos ellos controlados
  desde un sistema computerizado central de control, capaz de asegurar el control
  programado de dichas unidades, garantizando mediante una adecuada red de
  comunicaciones el posicionamiento de este control en diversas posiciones alternativas.
  También se ha previsto una dotación de 18 tiros manuales de cuerda para cubrir las
  necesidades no satisfechas por los conjuntos motorizados, A definir en el proyecto de
  ejecución.”. É todo este pormenorizado detalle das características do escenario
  compatible coa dúbida de se se está a falar dun Auditorio totalmente apto para
  representacións teatrais?.

En relación coa Sala Polivalente, no escrito de 8-10-2019 di que “en las Bases del
Concurso no se especifica que tipo de mobiliario se debe instalar, …. Y que la
incorporación de una gradería fija, así como del sistema de grada motorizada,
supone un coste de 18.900€ y 41.000€ respectivamente.”, pero no apartado da
Memoria “1.2.2 Adecuación al Programa de Necesidades” sobre a Sala Polivalente di:
“La capacidad de la sala es de 158 butacas. Con el fin de dotar de mayor flexibilidad la
Sala Polivalente, se instala una gradería retráctil que permite plegar 88 butacas
dejando un total de 70 sitios para sentarse y una sala plana que permite acoger una
mayor variedad de espectáculos. En el caso de esconder las butacas la sala tendrá una
cabida de 200 personas de pie y 70 espectadores sentados.”
No punto 5 descrito de 8-10-2019, di que “en las bases del concurso no se concretaba
que espacios deberían estar climatizados. El proyecto contempla la climatización de la
sala principal, la sala polivalente, el aula de ensayos y los camerinos” polo que quere
xustificar un incremento do custe de 325.000€. Sobre esta cuestión, ademais de
reiterase no xa alegado no escrito rexistrado no Concello o 6-01-2020, SumaRibeira
quere tamén transmitir que na Memoria de “Choiva Pedra e Cristal”, ao falar de
“Sostenibilidad” di: “El diseño arquitectónico del edificio tiene un enorme impacto en
el consumo de energía posterior que éste requiera para ser calefactado, refrigerado e
iluminado.”, e no “Capítulo 26: Instalaciones Climatización” figura un presuposto de
112.941,92€. Asemade, engadir aquí tamén o que xa se reflectiu neste escrito: Tamén
recolle o Concurso de Ideas que “Por otra parte el desarrollo del proyecto definitivo de
obra, deberá de dotar al edificio de todas las instalaciones necesarias, así como el
equipamiento preciso, para que una vez sea recibida la obra por la Administración, sea
útil y apropiado para iniciar la actividad para la que fue proyectado, sin tener que
realizar inversiones de equipamiento e instalaciones para el perfecto funcionamiento
del mismo”.
Esta información aquí resumida non estivo a disposición de todas as concelleiras e
concelleiros no Pleno no que o Alcalde propuxo a aprobación dun importante
incremento de orzamento para o “Auditorio Municipal”. A SumaRibeira isto lle parece
inaceptable.
É á vista do exposto a modo de resume que o concelleiro asinante deste escrito
solicita novamente que sexa un Pleno Municipal o que con toda a información
posible debata e decida sobre as pretensións de incremento de presuposto
reivindicado pola empresa “PGP Arquitectes”, coas argumentacións do seu escrito de
8-10-2019, que SumaRibeira considerou como non asumibles xa no devandito Pleno, e
que, á vista das nova información obxectiva conseguida, afora considera
inaceptables. Previamente ao Debate Plenario tamén solicita que sexa facilitada a
tódalas concelleiras a memoria do proxecto “Choiva Pedra e Cristal”, que entende
que non figuraba na información dispoñible polos concelleiros con anterioridade ao
Pleno Municipal onde de decidiu a aprobación da importante ampliación de crédito,
como tampouco figuraba nos tres “CD” que se facilitaron por solicitude do concelleiro
sobre os tres proxectos finalistas, e que só conseguiu logo de insistir ao botar en falla a
ausencia da memoria sobre o proxecto gañador e acceder á carpeta de información
escrita do mesmo.
O concelleiro asinante entende que, de non entrar a tomar en consideración e valorar
as referencias obxectivas aportadas, a Corporación Municipal incorrería neste caso
nunha praxe de deficiente xestión municipal e deixadez de responsabilidades de boa e
rigorosa xestión dos bens de toda a cidadanía.

SumaRibeira ven de presentar Alegacións á “Aprobación inicial de Suplemento de Crédito 2/2019” polo que se aprobou polo Pleno do pasado 25 de Novembro (punto 7 da Orde do Día), inicialmente, a concesión dunha ampliación de crédito para o Novo Auditorio Municipal de 1.499.423,88€ (para financiar con 400.000€ -a diferencia entre os 2.100.000€ dispoñibles e os 2.500.000€ máximos fixados no Concurso- e, asemade, con 1.099.423,88€ para acadar a cantidade de 3.599.423,88€ solicitados nun informe da empresa gañadora do Concurso).
Para o anteriormente exposto se nos presentou ao Pleno do 26 de Novembro, simplemente, que: “Visto o informe remitido por PGP ARQUITECTES UTE, adxudicatarios do contrato de redacción do proxecto de construción do novo Auditorio de Riveira, no que o orzamento de execución por contrata ascende aos 3.599.423,88 euros, o Concello necesita un financiamento adicional de 1.499.423,88 euros.”
SumaRibeira entende que non se respectou un criterio procedimental que debería ser esixible cunha construción destas características. O informe da “UTE PGP Arquitectes”, gañadora do concurso, no que se expón a necesidade dun incremento dun 60% no Presuposto para que o “Auditorio” cumprise cunha serie de expectativas, que si ten o Concello, non foi nin minimamente debatido pola Corporación Municipal.
Na proposta levada ao Pleno, feita a iniciativa do Equipo de Goberno, se concretan unhas cifras para incremento de crédito que reflicten todo o solicitado no informe de “PGP Arquitectes”.
Suma Ribeira, presentou Alegacións ao incremento de presuposto para o Auditorio de 1.099.423,88€ (3.599.423,88 – 2.500.000), fundamentalmente, en base a que discrepamos co Acordo Plenario que asumiu como un “auto de fe” todos os requirimentos económicos que a empresa “PGP Arquitectes” condiciona a unhas características técnicas que din que non estaban contempladas nas Bases do Concurso. SumaRibeira entende e defende que moitas desas eivas esgrimidas si estaban contempladas nas Bases do Concurso. É así, por exemplo, o que pasa cos requirimentos seguintes:

1.- Di a empresa “PGP” no seu informe que o encargo do proxecto é dun Auditorio, pero que cren máis axeitado que sexa unha “sala polivalente”, coa posibilidade de realizar teatro, cine e música. Tamén din que un Teatro dispón de “caixa escénica, peine e maquinaria escénica”, e permite realización de obras que requiren “tramoia, sistemas de iluminación por zonas,… que permitiría a realización de calquera obra teatral ou musical.”.
Pois ben, o “Concurso de Ideas para o Novo Auditorio Municipal de Ribeira e o seu Entorno”, sorprendentemente, vese aparecen, entre outras, reflectidas as seguintes concrecións: O Proxecto terá “Adaptabilidade escénica e poli funcional para a realización de espectáculos de distinta índole” (páxina 9). Disporá de “Caja escénica, compuesta y equipada con los elementos imprescindibles (candilejas, tramoya, etc,…)” (páx. 12).
Neste aspecto “PGP” conclúe, partindo de premisas coas que non estamos de acordo, que os requirimentos necesarios para poder usar o espazo como teatro serían: “Caja escénica y peine 150.000 €” e “Equipamiento escénico 272.000 €”. É por elo que SumaRibeira alegou, que debe rexeitarse a solicitude de incremento de presuposto de 422.000 € (150.000 + 272.000).

Á vista do exposto, en resume, SumaRibeira solicitou:

• Que se recorra formalmente as pretensións económicas da empresa, reclamando que o Auditorio contemple, segundo as Bases do Concurso, tódalas características polas que a empresa, inxustificadamente, esgrime a necesidade dun incremento de 839.300 € (325.000 + 92.300 + 422.000) que debe ser denegado.
• Que se convoque un Pleno Municipal, no que con información suficiente, necesaria e imprescindible sexa o Pleno quen teña posibilidade de decidir sobre as motivacións alegadas pola empresa “PGP Arquitectes” para a ampliación de presuposto que levou a incluír a solicitude de ampliación de crédito de 1.499.423,88€ no Pleno do pasado 26 de Novembro, e que sexa tamén o Pleno, neste imprescindible contexto, decida sobre as verdadeiras necesidades de incremento no orzamento do Auditorio, e sobre as medidas a tomar para reconducir o itinerario percorrido, ao noso entender inxustificada e desacertadamente, neste importante tema.

Somos firmes defensoras da necesidade inescusable e urxente de que tódolos núcleos de poboación dispoñan de sistemas de depuración eficaces.
Para Ribeira tamén é moi importante dispoñer dun Sistema de Depuración de Augas Residuais e Industriais. Temos que contribuír solidariamente ao coidado medioambiental en xeral, pero tamén temos dereito a esixir que vivamos nunha Ribeira san e sostible, na que o noso mar non contaminado axude ao desenvolvemento sostible de todos os sectores económicos relacionados directamente co mar.
O novo Sistema de Saneamento de Ribeira dende que comezou a funcionar amosou eivas importantes, que ocasionaron problemas á calidade de vida de moitas persoas. Algunhas destas eivas fóronse solucionando ou diminuíndo, pero o noso Sistema de Saneamento segue a presentar problemas para os que temos o dereito e a obriga de esixir solucións definitivas, mesmo no caso de que esas solucións requiran de custosas actuacións.
En contra do que na nosa opinión sería desexable, e que foi demandado por distintos colectivos, as Administracións competentes optaron por unha infraestrutura con altos requirimentos enerxéticos no seu funcionamento. Isto vai implicar, por exemplo, un gasto enerxético estimado duns 300.000€, é dicir, un 25% do custe total anual de 1.200.000€ que está previsto que teña que dedicar o Concello para o seu funcionamento e mantemento.
Chegados aquí,
botamos moi en falla a ausencia dun labor informativo previo polo noso Concello sobre custes, beneficios e lexislación vixente sobre as taxas que teríamos que pagar entre todas trala implantación do novo Saneamento. Nesta liña, queremos formular unha serie de opinións / interpelacións:

• Debe o Concello recadar mediante as taxas a totalidade dos 1.200.000€ de custe previstos?.
• Deben ser as taxas iguais para tódolos domicilios, cobrando un mínimo ata os 30 metros cúbicos (30.000 litros) de consumo trimestral, ou debemos primar en maior medida aos domicilios con menor consumo de auga?.
• Debemos aplicar sistemas de bonificación, ou mesmo nalgúns casos de exención, no pago do Saneamento ás familias con menos recursos?. Con que baremos?.
• Aplicaranse as bonificacións e exencións con cargo aos Presupostos Municipais?. Optarase, se é posible, por incrementar as taxas por Saneamento aos domicilios cuns indicadores económicos por riba dun determinado nivel?.
  En SUMA RIBEIRA pensamos que debe ser o Pleno do Concello, escoitando á veciñanza, quen aborde con claridade, transparencia, responsabilidade política e sensibilidade social unha política xusta e solidaria de implantación legal das Taxas de Saneamento que respondan a estas e outras cuestións de interese para a ciudadanía.

Exposición de motivos

E unha evidencia que cada vez aumenta mais o interese das persoas pola influencia do cambio climático sobre o noso futuro como especie , pero non só é unha crise climática, tamén é de biodiversidade e unha crise social, que se non facemos nada por evitalo levaranos a o aumento das inxustizas, guerras polos escasos recursos e o aumento e a maior virulencia das catástrofes naturais.

Dende suma Ribeira queremos aportar neste senso o noso grao de area dende o traballo municipal seguindo a máxima ecoloxista de ” PENSA GLOBAL, ACTUA LOCAL”. Esta iniciativa quere seguir a liña que lle presentáramos a cidadanía no noso programa electoral, con algunhas medidas no aspecto medioambiental para mellorar a calidade de vida dos nos@s concidadáns, e na procura dun concello mais sustentable.

Esta proposta que traemos hoxe ao pleno trata da promoción e fomento da produción e consumo dos produtos naturais , ecolóxicos , saudables e gustosos. É para elo que como primeira medida de concienciación e avance propoñemos a creación de HORTOS ECOLÓXICOS URBANOS MUNICIPAIS.

Moitas son as cidades e os pobos que os engaden como un atractivo mais o seu entorno urbano, como aproveitamento de recursos para a economía familiar , pasatempo de persoas, pedagoxía de escolares , alternativas sociais e culturais, ou tamén de estética paisaxística.

E sabido que esta práctica agrícola non ocasiona contaminación no entorno e polo contrario recicla residuos orgánicos , potencia os recursos naturais e é sustentable no tempo.

En Suma Ribeira somos coñecedoras da existencia no noso Concello de colectivos implicados nesta temática, que mesmo pensamos que poderían contribuír a dinamizala.

É polo exposto que dende Suma Ribeira solicitamos a aprobación dos seguintes acordos

Primeiro: que o Concello habilite un terreo urbano, ben sexa público ou chegando a un acordo cos seus propietarios, para a creación de HORTOS ECOLÓXICOS URBANOS PÚBLICOS en condicións axeitadas para que poidan ser traballados.

Segundo : O concello fomentará a utilización dos mesmos con campañas de promoción para espertar interese entre a veciñanza, coa finalidade de que as persoas que o desexen poidan inscribirse para cultivar unha parcela.
Terceiro : O concello creará programas e cursos de formación sobre os métodos de cultivo ecolóxico e todo o que se produza en estes hortos será con métodos naturais e non contaminantes (en ausencia de pesticidas, herbicidas , insecticidas, abonos de síntese ou plantas xeneticamente modificadas ).
Cuarto: Aproveitarase esta iniciativa para facilitar tamén o acceso da veciñanza interesada a coñecemento básico e práctico para a agricultura doméstica.

EXPOSICION DE MOTIVOS
Dende o ano 1998 depositáronse nas inmediacións da Illa de Sálvora 5 millóns de m3 de residuos (lodos) procedentes de diferentes dragados en portos de Galicia. Sabemos da intención da Consellería de Pesca e de Portos de Galicia (por novas aparecidas na prensa confirmándoo) de que os lodos do dragado no río Lérez, da Ría de Pontevedra se depositarán outra vez no mesmo punto, inmediacións da illa de Sálvora, nas coordenadas 42º 24’ 30”N e 09º 02’ 00”W, un lugar situado entre as illas de Sálvora e Ons. Desta vez prevese o depósito de 330.000 toneladas.
Consideramos que os fondos mariños non son compartimentos estancos, nin lugares inmutables. O seu estado e evolución depende de moitos factores que son incontrolables despois de que se convertan en depósitos de residuos. Ademais o lugar elixido e a zona de entrada das correntes que na Ría de Arousa entran polo Sur.
Tamén é sintomático que os poderes públicos que autorizaron os depósitos xa efectuados non deran conta do estado e evolución dos mesmos, ben porque non realizaron os estudos ou porque non teñen interese en que a cidadanía os coñeza.
Non está demais que recordemos que se queren depositar os lodos á entrada da ría máis produtiva do mundo, como non se cansan de repetir as nosas autoridades e que a convención OSPAR (Convención para a Protección do Medio Ambiente Mariño do Atlántico do Nordeste) recomenda seleccionar o lugar do mar onde realizar os vertidos tendo en conta a “cercanía a áreas de importancia biolóxica”, a “zonas de actividade extractiva” e a “zonas de cría” e que se debían determinar os efectos do material vertido, ademais de realizar unha avaliación do destino probable dos lodos por efecto dos procesos ambientais.
Somos sabedores tamén de que estes lodos se quixeron depositar na Ría de Pontevedra, preto da illa de Tambo., e pola presión social se tomou a decisión de buscar un lugar alternativo. Sabemos que as Confrarías da Ría da Arousa e outros sectores relacionados co Mar rexeitan tallantemente que estes vertidos se depositen nas inmediacións da Illa de Sálvora.
Conscientes de que o depósito de lodos no lugar elixido é un atentado ambiental nun lugar especialmente sensible e que se atopa moi próximo á illa de Sálvora (que forma parte do Parque Das Illas Atlánticas), de que existen alternativas menos daniñas para ao medio e de que é obriga das Administracións a busca de solucións ambientalmente respectuosas co medio, propomos ao Pleno do Concello de Ribeira que tome o seguinte

ACORDO

O Pleno da Corporación Municipal de Ribeira amosa, de acordo co exposto, o seu rexeitamento a que se depositen lodos procedentes de calquera actuación das Administracións sexa cal sexa o seu ámbito competencial. Para iso fará chegar as comunicacións pertinentes aos organismos administrativos que teñan algunha competencia na toma de decisión, máis concretamente Portos de Galicia, Consellería de Medioambiente, Xunta de Galicia e Goberno do Estado, onde se amose o rexeitamento ao depósito de lodos nas inmediacións da illa de Sálvora ou outro lugar da Ría da Arousa.

En SUMA RIBEIRA mantemos unha postura xeral de propiciar a municipalización dos Servizos Municipais sempre que o vexamos factible.
A xestión municipal da Depuradora a partires do 1 de xaneiro supón a aceptación por parte do Concello do Complexo da EDAR (Estación Depuradora de Augas Residuais) que, coma todas e todos sabemos, ten moitísimas deficiencias e causa graves problemas a toda a veciñanza aínda que unha parte desta se vexa máis directamente prexudicada polos insoportables cheiros que sofren, co conseguinte perigo para a súa saúde.
Ademais, por sensible que sexa o tema, non podemos silenciar a nosa fonda preocupación pola inseguridade que nos produce a posibilidade de que Residuos Industriais podan contaminar aos Residuos Urbanos, prexudicando o bo funcionamento do Sistema EDAR, facendo crónico o mal dos cheirumes, e quizais, incrementando custes do que debe ser, exclusivamente, a Depuración de Residuos Urbanos.
Doutra banda, a aceptación por parte do Concello desta xestión supón un incremento considerable no recibo da Auga, Lixo e Rede de Sumidoiros xa que haberá que engadir as taxas correspondentes á Depuración dos Residuos Urbanos. Moito maior sería o incremento se a veciñanza tivera que asumir o custo das reparacións.
Por todo o exposto, estamos de acordo na Xestión Municipal da Depuración dos Residuos pero unha vez que se teñan corrixido todas as deficiencias que o Complexo presenta, se teña perfectamente demostrado, na práctica, o seu correcto funcionamento integral e que o grave problema dos cheirumes estea resolto, cousa que é imposible que ocorra antes do día 1 de xaneiro. O período de proba deberá ser amplo para ter suficientemente probada a eficacia total do Sistema.
Tamén pensamos que a cidadanía debera estar xa informada do custe aproximado que este Servizo vai repercutir nos nosos recibos.